له ده‌یه‌ی دووهه‌می سه‌ده‌ی 21دا و له هه‌زاره‌ی سێهه‌مدا، له جیهانی سه‌رمایه‌داریدا، چینی كرێكار و خه‌ڵكی زه‌حمه‌تكێش، قورسایی یه‌كێك له ناخۆشترین قه‌یرانه‌كانی هاوچه‌رخیان له‌سه‌ر شانه و له هه‌موو ئه‌م جیهانه‌دا، ده‌ستدرێژیی ده‌وڵه‌ته‌كان و كاربه‌ده‌ستانی سه‌رمایه‌داری بۆ سه‌ر ژیانی كرێكاران و زه‌حمه‌تكێشان زیاتر بووه. له ئورووپا، قه‌یرانه یه‌ك له‌دوای یه‌كه‌كان هه‌ر جاره‌ی یه‌كێك له وڵاته‌كانی به‌ره‌و لێكترازان ده‌بات و له ئه‌مریكا ناڕه‌زایی ناوخۆیی له وه‌دینه‌هاتنی چاكسازیه‌كان و باشتر بوونی ژیانی خه‌ڵك، سیمای نێونه‌ته‌وه‌یی خاوه‌نی خه‌ڵاتی ئاشتیی جیهانی خه‌وشدار كردووه. له زۆربه‌ی وڵاتانی جیهان، دیكتاتۆره‌كان و رژیمه سه‌ركوتگه‌ره‌كانی پارێزه‌ری سیستمی چه‌وسێنه‌ر، له خواردنی به‌رهه‌می ره‌نج و ژیانی زۆرینه‌ی خه‌ڵك تێر ناخۆن.
رۆژی یه‌كی ئایاری 2011 هاوكاته له‌گه‌ڵ شه‌پۆلی بێ‌وێنه‌ی شۆڕش و راپه‌ڕینه‌كان له زۆربه‌ی وڵاتانی عه‌ره‌بی له باكووری ئه‌فریقا و له رۆژهه‌ڵاتی ناوه‌ڕاست، راپه‌ڕین و شۆڕشه‌كان هه‌تا ئێستا سیما و هاوكێشه ناوچه‌یی و ته‌نانه‌ت جیهانیه‌كانیشی تێكداوه. ئه‌م شۆڕشانه كه له ناڕه‌زایی كرێكاران و زه‌حمه‌تكێشانه‌وه هه‌ڵقوڵی، زۆر به خێرایی چه‌ندین وڵاتی داگرت و هه‌روا به‌رده‌وامه. ئه‌نجامه‌كانی – كه هه‌موو زلهێزه‌كانی جیهان بۆ كۆنترۆڵ كردنی كه‌وتوونه‌ته كار- هه‌رچی بێت، خه‌باتی چینی كرێكار و خه‌ڵكی زه‌حمه‌تكێشی له‌م به‌شه له جیهاندا خستووه‌ته قۆناغێكی نوێوه.
له ئێرانی ژێر ده‌سه‌ڵاتی رژیمی ئیسلامی، چینی كرێكار و خه‌ڵكی زه‌حمه‌تكێش دژوارترین سه‌رده‌می ژیانی خۆیان له رووی گوزه‌ران و دابین كردنه‌وه تێپه‌ڕ ده‌كه‌ن. رژیمی ئیسلامی به نه‌هێشتنی یارانه‌كان، قورسایی قه‌یران و ته‌نگژه‌كانی خۆی خستووه‌ته سه‌ر شانی خه‌ڵك و سووره له‌سه‌ر ئه‌وه‌ی به سیاسه‌تی مشتی ئاسنین، هه‌ر له‌مپه‌رێك له‌سه‌ر رێگه‌ی لابدات. هه‌ڵاوسانی ئابووری و گرانی كه به‌هیچ جۆرێك له‌گه‌ڵ نه‌گۆڕ مانه‌وه‌ی حه‌قده‌سته‌كان ته‌با نیه و كۆبوونه‌وه‌ی سه‌روه‌ت و سامانی ئه‌فسانه‌یی كاربه‌ده‌ستانی پله جۆراوجۆره‌كانی ده‌سه‌ڵاتی ئیسلامی، ژیانی زۆرینه‌یه‌كی هه‌ره زۆری له ئێران وه‌ها تووشی له‌ناوچوون كردووه كه خه‌ڵك جه‌هه‌نه‌می راسته‌قینه به هه‌موو جه‌سته‌یان هه‌ست پێده‌كه‌ن. ساڵی فیتنه یان جیهادی ئابووری، له راستیدا ناوی نهێنیی ئاماده‌كاری بۆ هێرش و ده‌ستدرێژیی زیاتر بۆ سه‌ر كرێكاران و بزووتنه‌وه‌ی كرێكاری و هه‌رچه‌شنه دادپه‌روه‌ریه‌كه كه ده‌سه‌ڵاتدارانی كۆماری ئیسلامی له هه‌موان زیاتر چاوه‌ڕوانی ده‌كه‌ن.
له‌گه‌ڵ ئه‌وه و سه‌ره‌ڕای سه‌ركوت و گوشاری له‌تاقه‌ت به‌ده‌ر بۆ سه‌ر چالاكان و رێبه‌رانی كرێكاران، ده‌بینین كه بزووتنه‌وه‌ی كرێكاری و خه‌باتی كرێكاران له ئێران بووه‌ته كۆڵه‌كه و ئه‌ستوونی سه‌ره‌كی و پته‌وی ناو خه‌باتی كۆمه‌ڵایه‌تی له دژی ده‌سه‌ڵاتی ئیسلامی. مانگرتنی به‌رده‌وامی كرێكاران و ئاماده‌بوونی رێبه‌رانی كرێكاران له ناڕه‌زایه‌تیه‌كان و بزووتنه‌وه كۆمه‌ڵایه‌تیه‌كان، قورسایی و به‌های رَبه‌رانی كرێكاران و بزووتنه‌وه‌ی كرێكاریی زیاتر كردووه. ناوی رێبه‌رانی كرێكاران له كۆڕ وكۆمه‌ڵه جیهانیه‌كان وه‌ها ده‌نگی داوه‌ته‌وه و كه ده‌سه‌ڵاتدارانی ئیسلامیی بۆ سه‌ركوت و جه‌نایه‌ت له دژی رێبه‌ر و چالاكانی كرێكاری، لاواز كردووه. خۆڕاگری و وه‌ستانی ئۆسانلووه‌كان ره‌وایی و حه‌قانیه‌تی خواست و ویسته‌كانی كرێكارانی زیاتر كردووه و له‌لایه‌كی دیكه‌وه بزووتنه‌وه‌ی كرێكاریی له ناو بزووتنه‌وه كۆمه‌ڵایه‌تیه‌كانی دیكه‌دا كردووه‌ته خاوه‌ن هێژمۆنی و رۆڵێكی پته‌و و به‌رجه‌سته‌تر.
ئه‌مساڵ بۆ چینی كرێكار و بزووتنه‌وه‌ی كرێكاری، ساڵێكی دژوار و هاوكات پڕ له گۆڕانكاری ده‌بێت. ساڵێكه كه له‌گه‌ڵ هه‌ڕه‌شه‌ی راسته‌وخۆی گه‌وره‌ترین به‌رپرسانی ویلایه‌ت و رژیمی ئیسلامی له دژی كرێكاران هاوكات بوو، كه مانایه‌كی نیه جگه له داسه‌پاندنی هه‌ل‌ومه‌رجێكی ناخۆشتر و كاره‌ساتبارتر كه ته‌نیا به سه‌ركوت و توندوتیژی مسۆگه‌ر ده‌بێت. هاوكات ساڵێكه پڕ له گۆڕانكاری كه ده‌رفه‌تی ئه‌وه به بزووتنه‌وه‌ی كرێكاری ده‌دات له وه‌ها سه‌رده‌مێكدا، ئه‌زموونی 30 ساڵ خه‌بات و خۆڕاگری بكاته تۆشه‌به‌ری ئاماده‌بوونی له ناوه‌ندی بزووتنه‌وه كۆمه‌ڵایه‌تی و ناڕه‌زاییه‌كان.
له كوردستان، رژیمی ئیسلامی كه له‌گه‌ڵ خۆڕاگریه‌كی جه‌ماوه‌ری و به‌رین به‌ره‌وڕووه، به سیاسه‌تێكی دیكه‌وه ده‌سه‌ڵاتی خۆی له دژی كرێكاران و زه‌حمه‌تكێشان ده‌سه‌پێنێت. رژیمی ئیسلامی له كوردستان به شێوه‌یه‌كی سیستماتیك پێشی به گه‌شه‌ی ئابووری و پرۆسه‌ی به‌رهه‌مهێنان گرتووه. رژیم له‌مباره‌یه‌وه سیاسه‌تێكی جێكه‌وتووی هه‌یه كه سه‌روه‌ت و سامانی كوردستان داگیر بكات، سه‌رچاوه‌كانی تاڵان بكات، سه‌رمایه‌ی گه‌وره له كوردستان قه‌ده‌غه بكات و كوردستان به دواكه‌وتوویی رابگرێت و كرێكاران به‌مجۆره ناچارن بۆ دۆزینه‌وه‌ی كار و دابین كردنی ژیانیان، به‌ره‌و دوورترین شوێنه‌كانی ئێران بڕۆن. كرێكارانی كوردستان له ئێراندا بڵاون و ته‌نیا رێژه‌یه‌كی كه‌میان له كوردستان و له ناوه‌نده‌كانی به‌رهه‌مهێناندا كار ده‌كه‌ن. له كوردستان هه‌ژاری و بێكاریی كرێكاران و زه‌حمه‌تكێشان زۆر به‌رینتر بووه. به‌ڵام سه‌ره‌ڕای ئه‌وه‌ش هه‌ڵسووڕاوانی كرێكاری له كوردستان توانیویانه بزووتنه‌وه‌ی كرێكاری رێكبخه‌ن، خواست و ویسته كرێكاریه‌كان باس بكه‌ن و په‌یوه‌ندی له‌گه‌ڵ بزووتنه‌وه‌ی سه‌راسه‌ریی كرێكاری له ئێران بگرن. بزووتنه‌وه‌ی كرێكاریی كوردستان له‌گه‌ڵ هه‌موو له‌مپه‌ره‌كان، زیاتر له جاران خۆی نیشانداوه و بووه‌ته یه‌كێك له بزووتنه‌وه كۆمه‌ڵایه‌تیه‌كانی كوردستان كه هه‌ڵسووڕاو و چالاك و رێبه‌ر و ویستی خۆی هه‌یه.
رۆژی یه‌كی ئایار ده‌رفه‌تێكه بۆ یه‌كگرتوویی و هاوپشتیی دووباره‌ی كرێكاران بۆ نان و ئازادی و ده‌ستكه‌وتنی ماف و ویسته‌كانیان. رۆژی یه‌كی ئایار پیرۆز راده‌گرین و به هه‌موو توانامانه‌وه و هاوڕێ له‌گه‌ڵ كرێكاران و زه‌حمه‌تكێشان بۆ گه‌یشتنی كرێكاران به خواسته‌كانی خۆیان و گه‌یشتن به جیهانێكی ئازاد و یه‌كسان و دوور له سته‌م و چه‌وسانه‌وه تێده‌كۆشین و له خه‌باتی ئه‌واندا خۆمان به به‌شێك له له‌شكری گه‌وره‌ی ره‌نج و كار ده‌زانین.
پیرۆزبایی رۆژی جیهانیی كرێكار له هه‌موو كرێكارانی جیهان، ئێران و كوردستان ده‌كه‌ین. رێز له هه‌موو گیانبه‌ختكردووانی بزووتنه‌وه‌ی كرێكاری و هه‌موو چالاكانی به‌ندكراو و هه‌موو ئه‌و كه‌سانه ده‌گرین كه له پێناو سیستمێكی عادیلانه و یه‌كساندا خه‌بات ده‌كه‌ن.
بژی یه‌كی ئایار
به‌گوڕتر بێت بزووتنه‌وه‌ی كرێكاریی ئێران و كوردستان
بڕووخێت رژیمی كۆماری ئیسلامی
بژی سۆسیالیزم
كۆمه‌ڵه‌ی زه‌حمه‌تكێشانی كوردستان
11ی گوڵانی 1390، 1ی ئایاری 2011
هیچ نظری موجود نیست:
ارسال یک نظر